Pisortaqarfinni soorlu kommunini, Namminersorlutik Oqartussani, Naalagaaf-fiup suliffeqarfiutaanni ingerlatsinerit kiffartuussinerilu aningaasatigut ingerlaneri kisitsisitigut paasissutissani uani ersersinneqarput. System of National Accounts 1993 (SNA 93) aamma Det europæiske nationalregnskabssystem 1995 (ENS 1995) nunani tamalaani nuna tamakkerlugu naatsorsuusiornerni atorneqartartut malillugit kisitsisigut paasissutissat suliarineqarput. Taamaaliornikkut nunanut allanut sanilliussisoqarsinnaanissaa qulakkeerneqarpoq. Taamaakkaluartoq nunanut allanut assingusumik ineriartorsimasunut sanilliussinissaq pingaaruteqarpoq. Saqqummersitami uani Kalaallit Nunaanni 2019-imiit 2024-mut pisortat aningaasaqarnerisa ineriartorsimanerat takutinneqarpoq.
Saqqummersitaq pingasunut immikkoortinneqarsimavoq, immikkoortut kisimiitillugit imaluunniit saqqummersitaq tamakkerlugu atuarneqarsinnaapput. Kapitalini 2-5 pisortat ingerlatsinerat kiffartuussinerallu ataatsimut isigalugu, kommunit, Namminersorlutik Oqartussat, aamma Naalagaaffiup Kalaallit Nunaanni suliffeqarfiutaasa aningaasatigut ingerlaneri takuneqarsinnaapput.
Kapitali 6-imi kisitsisitigut naatsorsuusiornermi najoqqutat sammineqarput, kapitalimilu 7-imi taaguutit aamma nunani tamalaani malittarisassat atorneqartut sammineqarlutik. Taakkununnga ilanngullugu tabelit saqqummersitami ilanngunneqarsimasut misissorneqarput, pisortat aningaasat atugaat aamma isertitaat takutinneqarlutik, taakku nuussinernut (aningaasarsiorneq tunngavigalugu agguataarineq), aamma anguniakkanut immikkoortillugit (suliat tunngavigalugu agguataarineq). Immikkoortumi taaguutit aamma najoqqutani immikkoortiterinerit marluk sammineqarput ilaatigut COFOG, Classification of Functions of Government-i nutaaq itisilerlugu sammineqarluni.
Saqqummersitami kapitali 8 kingulliuvoq, tassani tabelit takuneqarsinnaapput. Kapitali 8-mi tabelit kapitali 2-5-imi takussutissiat itisilernerivaat.
Kisitsisaataasivimmi bank.stat.gl-imi 1994-imiit 2024-mut kisitsisitigut paasissutissat sukumiinerusut elektroniskinngorlugit pissarsiarineqarsinnaapput.
Saqqummersitamik iluarsaassineq
Kisitsisit 2022-miit 2023-mut uani saqqummersitami iluarsaanneqarput. Iluarsaassinermut pissutaapput kommuneqarfiit naatsorsuutaasa ilaat kisitsisaagallartut ilanngunneqarsimaneri. Kisitsisaagallartut kisitsisiviusunik taarserneqarsimasut taarsiissutaat ilanngunneqarput. 2022-mi aamma 2023-mi naalagaaffiup naatsorsuutaaniittut ataasiakkaat iluarsineqarput taamatuttaaq Nunatta Karsiata 2023-mi naatsorsuutai iluarsineqarlutik.
2025 septembarip aallartisimalernera aallarnerfigalugu pisortat ataatsimoorussamik aningaasaqarnermut aqutsissutaanit pissarsiarineqarput. Piffissami pineqartumi naatsorsuutit Kommune Kujallermi 2024-moortut suli naammassisimanngillat. Taakku pissutaallutik 2024-mi kisitsisit kisitsisaagallarput.